لاہور/ ننکانہ صاحب/ شیخوپورہ/ فیروزوالا (نامہ نگار+ نمائندگان) صوبائی دارالحکومت کے مختلف علاقوں میں وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات، موبائل فون اور دیگر سامان لوٹ لیا گیا۔ ننکانہ صاحب میں پولیس مقابلے کے دوران 2 ڈاکو ہلاک ہو گئے جبکہ ان کے ساتھی فرار ہونے میں کامیاب ہو گئے۔ تفصیلات کے مطابقہربنس پورہ میں آصف کے گھر سے10 لاکھ، فیصل ٹائون میں انعام کے گھر سے8 لاکھ، شفیق آباد میں رشید کے گھر سے6 لاکھ کی نقدی، طلائی زیورات اور دیگر سامان جبکہ گلبرگ میں نعمان کی دکان سے7لاکھ کی نقدی اورسامان چوری ہو گیا۔ ڈاکوؤں نے سول لائن میں لبنیٰ اور اس کی فیملی سے 4 لاکھ جبکہ لیاقت آباد کے علاقہ میںریاض اور اس کی فیملی سے ایک لاکھ کی نقدی، طلائی زیورات، موبائل فون، مغلپورہ میں وقاص سے ایک لاکھ 66ہزار روپے اور موبائل فون، گلبرگ میں ثاقب سے 90 ہزار روپے اور موٹر سائیکل، کاہنہ میں عامر سے 56ہزار روپے اور موبائل فون لوٹ لیا۔ چوروں نے جوہر ٹائون سے زبیر، جنوبی چھاؤنی سے نذیر کی کاریں جبکہ شالیمار میں ریاض، نواں کوٹ میں سے امانت، جوہرٹائون میں محمد علی، نواب ٹائون میں طلحہ، چوہنگ میں غوث، فیکٹری ایریا میں اسد، اچھرہ میں عبید، لیاقت آباد میں جاوید، گرین ٹائون میں ثناء اللہ اور اسلم کی موٹر سائیکلیں چوری کر لی ہیں۔ علاوہ ازیں پولیس تھانہ بڑا گھر کو اطلاع ملی کہ سیدوالا موڑ پر چک نمبر 4 کے قریب ڈاکو ناکہ لگا کر لوٹ مار کر رہے ہیں جس پر پولیس موقع پر پہنچ گئی تو پولیس کو دیکھ کر ڈاکوئوں نے فائرنگ شروع کر دی۔ پولیس کی جوابی فائرنگ سے 2 ڈاکو ہلاک ہو گئے جبکہ انکے ساتھی رات کی تاریکی کا فائدہ اٹھا کر فرار ہو گئے۔ ادھر شیخوپورہ کے علاقے بھکھی میں 10 ڈاکو ایک زمیندار شوکت کے گھر گھس گئے اور اہلخانہ کو یر غمال بنا کر 14تولے طلائی زیورات اوردو لاکھ روپے کی نقدی لوٹ لی مزاحمت کرنے پر شوکت کے بھائی رضوان اور اس کی بہن فرزانہ کو گولیاں مار کر شدید زخمی کر دیا اور فرار ہو گئے۔ فیروزوالا سے نامہ نگار کے مطابق رانا ٹائون میں ڈاکوئوں نے بنک سے رقم لے کر آنے والے شہری محمد بوٹا کو روک کر ایک لاکھ 10 ہزار رورپے چھین لئے۔ ڈاکوئوں نے محمد ارشد اور اسکے بھائی جاوید کو لوٹ لیا۔ منڈیائی کے قریب ڈاکوئوں نے شکیل سے نقدی، موبائل چھین لیا۔ کوٹ پنڈی داس میں دکاندار عبدالمجید سے 78 ہزار اور موبائل چھین لئے۔ صدر تھانہ کے علاقے میں ڈاکوئوں نے موٹر سائیکل سوار احسان اللہ اور اسکی بیوی کو روک کر زیورات اور نقدی چھین لی۔