اسلام آباد/ لاہور (ایجنسیاں+ نیوز ڈیسک) کرپشن میں ملوث فوج کے اعلیٰ افسروں کیخلاف کارروائی کی خبر نشر ہونے کے بعد ٹوئٹر پر تھینک یو راحیل شریف ٹاپ ٹرینڈ بن گیا۔ کرپشن کیخلاف کارروائی کی خبر کو سوشل میڈیا پر کافی سراہا جا رہا ہے اور خاص طور پر اس کا کریڈٹ سربراہ پاک فوج جنرل راحیل شریف کو دیا جارہا ہے۔ایک شہری نے ٹوئٹر پر لکھا کہ کرپشن کے خلاف جنگ شروع ہو گئی، کسی نے آرمی چیف کو یوں سراہا دنیا کا سب سے بہترین سربراہ صرف پاکستانی فوج پیدا کر سکتی ہے۔ بیسٹ آف راحیل شریف اور کوئی چلا اٹھا ویل ڈن راحیل شریف تبدیلی اب آئی ہے۔ قوم کا فخر، بہادر فوجی۔ سوشل میڈیا پر شہریوں نے آرمی چیف کو کئی لقب دئیے۔ فیس بک پر بھی شہریوں نے اقدام کو سراہتے ہوئے دیگر اداروں کی کرپشن کے خاتمے میں اپنا کردار ادا کرنے کو کہا ہے۔