سکھیکی/ پنڈی بھٹیاں/ پھولنگر/ جمبر (نامہ نگاران) ٹریفک کے مختلف حادثات کے دوران مختلف حادثات کے دوران باپ بیٹی سمیت 5افراد جاں بحق ہو گئے۔ تفصیل کے مطابق سکھیکی کے نواحی گائوں ٹھٹھہ عاصیاں کا رہائشی نذیر احمد اپنی 25سالہ بیٹی فرزانہ کوثر 4 سالہ نواسے علی حسن اور7سالہ نواسی اریبہ کے ساتھ سکھیکی منڈی خریداری کے لیے آئے وہ موٹر سائیکل پر واپس گائوں جا رہے تھے جب وہ طویلے والی کھٹرانی موڑ پر حافظ آباد روڈ پر پہنچے تو سڑک کراس کرتے ہوئے سیالکوٹ سے فیصل آباد کی طرف سے جانے والی تیز رفتار بس نے موٹر سائیکل کو ٹکر مار دی جس کے نتیجے میں 60 سالہ نذیر احمد اور اس کی بیٹی فرزانہ کوثر موقع پر جاں بحق ہو گئے۔ جائے حادثہ پر 15 کلو میٹر دور واقع گائوں سے آ کر ان کے ورثاء نے زخمی بچوں کو ڈسٹرکٹ ہسپتال حافظ پہنچایا۔ عینی شاہدین کے مطابق سکھیکی پولیس اور ٹریفک پولیس موقع پر پہنچ تو گئی مگر نعشوں کو ایک گھنٹہ تک سڑک سے نہ اٹھایا۔ سکھیکی پولیس نے بس اور موٹر سائیکل کو قبضہ میں لے لیا۔ پھول نگر جمبر بائی پاس پر موٹر سائیکل سوار ماں بیٹا کو پتو کی سے آنے والی کار نے ٹکر مار دی۔ حادثہ کے باعث موٹر سائیکل سوار شریفاں بی بی اور کار سوار عمر صدیق اور وقاص موقع پر جاں بحق ہو گئے۔ پولیس نے نعشوں کو قبضہ میں لے کر کارروائی شروع کر دی۔