قصور (نمائندہ نوائے وقت + نامہ نگار) تھانہ صدر پھولنگر کے علاقہ نتھے جاگیر میں بدچلنی کے شبہ میں خاوند نے بیوی کو آشنا سمیت ٹوکوں کے وار کر کے قتل کر دیا۔ نتھے جاگیر کے رہائشی محمد جمیل نے مقدمہ درج کروایا کہ گزشتہ روز شام کے وقت ملزم امانت میرے بیٹے ندیم کو اپنے گھر لے گیا جو دیر تک واپس نہ آیا، امانت کے گھر گیا تو دیکھا ملزمان امانت وغیرہ 5 اور 2 نامعلوم میرے بیٹے ندیم پر چھریوں اور ٹوکوں کے وار کر رہے تھے۔ امانت کی بیوی ذلیخہ بی بی چھڑانے کیلئے آگے بڑھی تو ملزموں نے اس پر بھی ٹوکوں اور چھریوں کے پے درپے وار کئے۔ میرا بیٹا ندیم اور ذلیخہ بی بی شدید زخمی ہوگئے جو بعد میں زخموں کی تاب نہ لاتے ہوئے جاں بحق ہوگئے۔ ملزموں کو میرے بیٹے ندیم پر ذلیخہ بی بی کے ساتھ ناجائز تعلقات کا شبہ تھا۔ تھانہ صدر پھولنگر پولیس نے مقدمہ درج کر کے دو ملزموں کو گرفتار کر کے تفتیش شروع کردی ہے۔