اسلام آباد+ کراچی (ایجنسیاں + نوائے وقت رپورٹ) اسلام آباد کے ایف نائن پارک اور کراچی کے باغ جناح میں جلسوں کے بعد گندگی کے ڈھیر پڑے ہیں، کنٹینر بھی نہیں ہٹائے گئے۔ ایف نائن پارک سے کرسیاں اور دیگر سامان تو اٹھا لیا گیا‘ لیکن جگہ جگہ کچرے کے ڈھیر ہیں۔ آئی این پی کے مطابق جگہ جگہ گندگی کے ڈھیروں سمیت پھولوں اور پودوں کا بھی نقصان ہوا۔ پارک میں علی الصبح سیر کیلئے آنے والے بھی گندگی پر سخت برہم دکھائی دیئے۔ شہریوں نے بتایا کہ عوامی مقامات پر سیاسی پارٹیوں کو جلسے اور جلوسوں کی اجازت نہ دی جائے۔ دوسری طرف عمران خان نے مقامی قیادت کو ایف نائن پارک کی صفائی کی ہدایت کردی ہے۔ مرکزی میڈیا ڈیپارٹمنٹ کے بیان کے مطابق عمران خان نے کہا ہے کہ تحریک انصاف کے ذمہ دار اور کارکن فاطمہ جناح پارک کو مکمل طورپر کچرے سے پاک کریں۔