سرگودھا میں جھڑپ‘ دہشت گرد خودکش جیکٹ اور اسلحہ سمیت گرفتار، 2 فرار
سرگودھا (نامہ نگار) نواحی علاقے 87 شمالی شاہین آباد روڈ پر کائونٹر ٹیررزم ڈیپارٹمنٹ کے چھاپے کے دوران فائرنگ کے تبادلے کے بعد ایک دہشت گرد کو خودکش جیکٹ اور اسلحہ سمیت گرفتار کر لیا گیا جبکہ 2 دہشت گرد فرار ہونے میں کامیاب ہو گئے۔ تفصیلات کے مطابق سرگودھا کے شاہین روڈ پر کائونٹر ٹیررزم ڈیپارٹمنٹ نے کارروائی کرتے ہوئے چھاپہ مارا تو دہشت گردوں کی جانب سے شدید فائرنگ کی گئی جس پر پولیس کی طرف سے جوابی کارروائی کی گئی۔ کارروائی کے دوران ایک دہشت گرد کو خودکش جیکٹ اور اسلحہ سمیت گرفتار کرلیا گیا جبکہ اس کے دو ساتھی فرار ہونے میں کامیاب ہوگئے۔ گرفتار دہشت گرد کو نامعلوم مقام پر منتقل کردیا گیا ہے۔
