اسلام آباد (نوائے وقت رپورٹ) چیئرمین سینٹ رضا ربانی نے امریکی ہم منصب کو دورہ پاکستان کی دعوت ایف 16 طیاروں کی ڈیل سے مشروط کر دی۔ رضا ربانی نے رولنگ دی دفتر خارجہ نے درخواست کی تھی چیئرمین امریکی سینٹ کو مدعو کریں 22 مارچ کوامریکی سینٹ کے چیئرمین کو خط لکھ کر دورے کی دعوت دی اب اس دعوت کو ایف 16 طیاروں کی ڈیل پر پیشرفت سے مشروط کر رہا ہوں۔ سینٹ ارکان نے 12 مئی واقعہ پر پرویز مشرف کے خلاف ایف آئی آر درج کرنے کا مطالبہ کردیا ہے۔ چیئرمین سینٹ رضا ربانی نے سانحہ 12 مئی پر اظہار خیال کرتے ہوئے کہا آرٹیکل 6 آئین کے تحفظ میں ناکام ہو گیا آئین سے حذف کر لیں آئین اور آئینی اداروں کا تحفظ صرف پاکستان کے عوام ہی کرتے ہیں واقعہ کا ذمہ دار تو ملک سے باہر ہے آپ کس کے خلاف ایف آئی آر درج کرنے کی بات کرتے ہیں۔