اسلام آباد (سپورٹس رپورٹر) عقیل خان نے بینک الفلاح صبح نو نیشنل کلے کورٹ ٹینس چیمپئن شپ جیت کر ایک اور ٹائٹل اپنے نام کرلیا۔ گزشتہ 15 سال سے بھی زائد عرصے سے ملکی سطح پر شاندار کارکردگی کا مظاہر ہ کرنے والے عقیل خان نے مینز سنگلز کے فائنل میںایم عابد کو ہرایا۔ ایم عابد پہلا سیٹ جیتنے کے باوجود عقیل خان کو ہرانے میں کامیاب نہ ہو سکے۔ عقیل خان کو ٹرافی اور 40 ہزار روپے جبکہ حریف کو 25 ہزارروپے اور رنرز اپ ٹرافی ملی۔ مالدیپ کے سفیر مسٹر احمد سلیم اور پاکستان ٹینس فیڈریشن کے صدر سینیٹر سلیم سیف اللہ مہمان خصوصی تھے۔ مینز سنگل فائنل سے قبل عقیل خان نے ہیر ا عاشق کے ساتھ مل کر شہزاد خان اور یاسر خان کو ہرا کر مینز ڈبلز ٹائٹل بھی اپنے نام کیا اور وننگ ٹرافی کے ساتھ 20 ہزار روپے کی انعامی رقم جیتی ۔ رنرز اپ جوڑی 12 ہزار روپے جیتنے میں کامیاب رہی۔ لیڈیزسنگلزکا ٹائٹل سارہ منصورکے نام رہا جنہوں نے اوشنا سہیل کو بآسانی ہرا کر ٹائٹل اپنے نام کیا۔ سارہ منصور کو 30 ہزا ر روپے کیش ایوارڈ ملا جبکہ اوشنا سہیل نے 18 ہزار روپے جیتے۔ ایم مزمل نے سید نوفل کلیم کو شکست دے کر بوائز انڈر18 کا ٹائٹل جیتا ۔ مزمل کو ٹائٹل جیتنے پر 12 ہزار روپے جبکہ سید نوفل کلیم کو 8 ہزار روپے دیے گئے۔ شعیب خان نے عاقب عمر کو شکست دے کر بوائز انڈر 14 کا ٹائٹل جیتا انہیں 10 ہزار روپے انعامی رقم دیے گئے ۔عاقب عمر کو 6 ہزار روپے ملے۔ بوائزانڈر10 کا ٹائٹل حمید اسرار کے نام رہا۔