لاہور (نامہ نگار) میوہسپتال کی پارکنگ میں نامعلوم افراد نے فائرنگ کر کے یورالوجی ڈپارٹمنٹ کے رجسٹرار ڈاکٹر واجد علی کو شدید زخمی کر دیا اور فرار ہو گئے ہیں۔ تفصیلات کے مطابق گوالمنڈی کے علاقہ میوہسپتال لاہور کی پارکنگ میں موٹر سائیکل سوار 2 نامعلوم افراد نے یورالوجی ڈپارٹمنٹ کے رجسٹرار ڈاکٹر واجد علی پر گولیاں چلا دیں۔ جس کے نتیجے میں ڈاکٹر واجد علی شدید زخمی ہو گئے جبکہ حملہ آور فرار ہو گئے۔ ڈاکٹر واجد علی کو فوری طور پر طبی امداد کے بعد آپریشن تھیٹر منتقل کردیا گیا۔ ڈاکٹروں کے مطابق ان کے سینے میں دو گولیاں لگی ہیں اور ان کی حالت تشویشناک ہے۔ ڈاکٹر واجد کے اہل خانہ کا کہنا ہے کہ ڈاکٹر واجد کا کسی کے ساتھ جھگڑے کا سوال ہی پیدا نہیں ہوتا۔ دوسری جانب پولیس کا کہنا ہے کہ نامعلوم افراد کے خلاف مقدمہ درج کر کے تحقیقات کا آغاز کردیا گیا ہے۔