لاہور + فاروق آباد + فیروزوالا (نامہ نگار + نمائندگان) صوبائی دارالحکومت کے مختلف علاقوں میں وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات،موبائل فون، گاڑیاں، موٹر سائیکلیں اور دیگر سامان لوٹ لیا جبکہ ایک کمپنی ملازم سے 37لاکھ روپے لوٹنے کے بعد اسے فائرنگ کر کے شدید زخمی کردیا ہے۔ فاروق آباد میں زیور چھیننے کے دوران مزاحمت پر ڈاکوئوں نے لڑکی کو فائرنگ کرکے قتل کر دیا۔ تفصیلات کے مطابق سٹی رائیونڈ کے علاقہ مانگا روڈ پرمقامی کمپنی کے ملازمین وقار اور اس کا بھائی نثار گاڑی میںکیش لے کر جارہے تھے کہ چار ڈاکوئوں نے انہیں روک کرگن پوائنٹ پر 37لاکھ روپے رقم لوٹ لی اور مزاحمت کرنے پر فائرنگ کر کے نثار کو زخمی کردیا اور فرار ہو گئے ہیں۔ ہڈیارہ کے علاقہ گھونڈی موڑ پر واقع خلیل کے ڈیرے میں پانچ ڈاکوئوں نے گھس کرملازمین کو یرغمال بنا کر 16لاکھ 35ہزارکی نقدی اور ٹریکٹر ٹرالی لوٹ لی۔ شادمان میں اسد منیر سے 13 لاکھ 13ہزار، سندر میں ذیشان سے 10لاکھ 46ہزار، باغبانپورہ کے علاقہ داروغہ والا میں انور کے گھر میں تین ڈاکوئوں نے گھس کر 9لاکھ روپے مالیت کی نقدی، طلائی زیورات، موبائل فون اور دیگر سامان لوٹ لیا۔ ڈاکوؤں نے شاہدرہ ٹائون میں علی سے 80ہزار اور موبائل فون، نواں کوٹ میں آصف سے 45ہزا ر اور موبائل فون، شاہدرہ میں نذیر کی دکان سے 20ہزار اور موبائل فون لوٹ لیا۔ چوروں نے ماڈل ٹائون میں توقیر کے گھر سے 25لاکھ کی نقدی، زیوارت اور دیگر سامان چوری کر لیا۔ چوروں نے کینٹ سے نذر، گجرپورہ سے عاصم کی گاڑیاں جبکہ شاہدرہ میں سے عتیق، نواں کوٹ میں خالد، ساندہ میں توقیر، ستوکتلہ میں خضر، فیکٹری ایریا میں نادر، شمالی چھائونی میں کامران، باٹا پور میں حسن، کوٹ لکھپت میں امتیاز، گارڈن ٹائون میں قاسم، فیصل ٹائون میں معاذ، کاہنہ میں سے ظفر کی موٹرسائیکلیں چوری کر لی ہیں۔ ادھر فاروق آباد میں گائوں کجر کی زیانہاپنی والدہ کے ساتھ موٹرسائیکل رکشہ پر کجر گائوں سے فاروق آباد کی طرف جا رہی تھی کہ سیم نالہ کے قریب ڈاکوئوں نے گن پوائنٹ پر رکشہ روک کر زیانہ سے رقم اور زیورات چھیننے کی کوشش کی مزاحمت کرنے پر ڈاکووں نے فائرنگ کر دی جس سے زیانہ شدید زخمی ہو گئی جسے فوری ڈی ایچ کیو شیخوپورہ منتقل کر دیا گیا جہاں زخموں کی تاب نہ لاتے ہوئے جاںبحق ہو گئی۔ ادھر کوٹ عبدالمالک کے قریب ڈاکوئوں اور پولیس کے درمیان مقابلے میں ڈاکووں کی فائرنگ سے پولیس اہلکار زخمی ہو گیا جب کہ ڈاکو موٹرسائیکل پھینک کر فرار ہوگئے۔ ساندہ لاہور پولیس زیر حراست ڈاکو احسن اقبال کی نشاندہی پر اس کے ساتھیوں کو پکڑنے کے لئے شرق پور خورد کوٹ عبدالمالک میں چھاپہ مارا تو ڈاکوئوں نے پولیس پارٹی پر فائرنگ کر دی جس کے نتیجے میں لاہور پولیس کا کانسٹیبل عامر شدید زخمی ہو گیا۔ ادھر شرق پور روڈ پر ڈاکوئوں نے ناکہ لگا کر میاں بیوی سمیت متعدد راہگیروںکو روک کر لوٹ لیا۔ ڈاکو نقدی، موبائل دیگر سامان لوٹ کر فرار ہو گئے۔ ڈاکوئوں نے پھیریانوالہ کے اسلم اس کی بیوی کو لوٹ لیا۔ خان پور نہر کے قریب ڈاکوئوں نے ڈاکٹر آصف اور اس کے ساتھی کو لوٹ لیا۔ ادھر بیلہ کے قریب مبینہ پولیس مقابلے میں ایک ڈاکو ہلاک ہو گیا۔ ڈی پی او لسبیلہ ضیا مندوخیل کے مطابق ڈاکو اعظم بگٹی متعدد واراتوں میں مطلوب تھا۔
مزاحمت/لڑکی قتل