کراچی (نوائے وقت رپورٹ+آئی این پی) کراچی کے علاقے منگھوپیر میں رینجرز اور پولیس کی مشترکہ کارروائی میں تین دہشت گرد مارے گئے۔ ترجمان رینجرز کے مطابق چھاپہ خودکش دھماکوں میں ملوث ملزموں کی گرفتاری کیلئے مارا گیا تو دہشت گردوں نے فائرنگ کر دی۔ جوابی فائرنگ میں تین دہشت گرد ہلاک ہو گئے۔ ہلاک دہشت گردوں سے خودکش جیکٹ، دھماکہ خیز مواد، بال بیرنگ برآمد کر لئے گئے۔ ادھر پرانی سبزی منڈی کے قریب رینجرز نے سرچ آپریشن کے دوران 15ملزمان کو حراست میں لے لیا ہے جبکہ لانڈھی89 اور اورنگی مجاہد کالونی میں فائرنگ کے واقعات میں 2افراد ہلاک ہوگئے۔کراچی میں کے ڈی اے انسداد تجاوزات سیل کے سربراہ جمیل بلوچ لاپتہ ہوگئے۔ پولیس کے مطابق جمیل بلوچ دفتر سے گھر جاتے لاپتہ ہوئے۔ جمیل بلوچ کی گاڑی عزیز بھٹی تھانے سے کچھ فاصلے پر ملی۔