تخت بھائی(صباح نیوز) تخت بھائی کے علاقہ ساڑو شاہ میں پولیس کی کارروائی کے نتیجہ میں تین اشتہاری ملزم ہلاک ہو گئے جبکہ ایک کو گرفتار کر لیا گیا، ڈی آئی جی مردان محمد طاہر خان کے مطابق ہلاک افراد کا تعلق چارسدہ کے علاقہ دوہرہ سے تھا، ہلاک ملزم پولیس کو قتل، ڈکیتی،اغواء برائے تاوان سمیت مختلف نوعیت کے مقدمات میں مطلوب تھے، پولیس کو اطلاع ملی کہ ملزموں کا گروہ تخت بھائی کے علاقہ ساڑو شاہ کے گائوں قیم کلی میں موجود ہے جس پر مردان اور چارسدہ کی پولیس نے مشترکہ کارروائی کر کے چھاپہ مارا۔ڈی آئی جی مردان کے مطابق ملزمان نے پولیس کو دیکھتے ہی فائرنگ شروع کر دی اور پولیس کی جوابی فائرنگ سے تین افراد مارے گئے جبکہ ایک کوزندہ گرفتار کر لیا گیا۔ڈی آئی جی کے مطابق ملزموں کے قبضہ سے کلاشنکوف ،پستول اور دیگر اسلحہ برآمد ہوا ہے۔