لاہور(خبرنگار) وزیراعلیٰ پنجاب محمد شہباز شریف اور ان کے بیٹوں حمزہ شہباز اور سلمان شہباز نے لندن کے ہسپتال میں وزیراعظم محمد نواز شریف کی عیادت کی۔ بڑے بھائی کے کامیاب آپریشن پر وزیراعلی کا چہرہ کھل اٹھا۔ لندن میں وزیر اعلی شہباز شریف اور ان کے بیٹوں نے ٹیکسی میں سفر کیا۔ وزیراعلی اپنے بیٹوں کے ہمراہ ٹیکسی میں ہسپتال آئے اور ٹیکسی میں ہی واپس گئے۔ وزیراعلیٰ نے اس موقع پر کہا کہ میرے بڑے بھائی اور پاکستانی قوم کے ہر دلعزیر وزیراعظم کی کامیاب ہارٹ سرجری کے لیے کروڑوں لوگوں نے ہاتھ اٹھا کر اللہ تعالیٰ کے حضور بے حساب دعائیں کیں اور ان دعائوں کی برکت سے وزیر اعظم محمد نواز شریف کے دل کا کامیاب بائی پاس آپریشن ہوا اور یقینا یہ لمحات اطمینان، شکر اور اللہ تعالی کے حضور سربسجود ہونے کے ہیں۔ شہباز شریف نے لندن میں گفتگو کرتے ہوئے بتایا کہ وزیراعظم محمد نوازشریف بہت حوصلے والے انسان ہیں اور میں نے انہیں ایک لمحے کے لئے بھی مضطرب نہیں پایا۔ وزیراعظم محمد نوازشریف کو اللہ تعالیٰ کی ذات پر بے پناہ اعتماد ہے اور ان کے دل میں خدا خوفی موجود ہے اور ایک ہمدرد انسان کا دل رکھتے ہیں۔