پاک آرمی نے سری لنکن انفنٹری ٹیم کو ہرا کر والی بال چیمپئن شپ جیت لی
لاہور( سپورٹس رپورٹر+ نمائندہ سپورٹس) پاکستان آرمی والی بال ٹیم نے سری لنکا کی لنکن لائٹ انفنڑی ٹیم کو شکست دے کر انٹر رجمنٹ والی بال چیمپئن شپ جیت لی۔ منگل کو سری لنکا کے شہر کولمبو سے جاری پریس ریلیز کے مطابق پاکستان آرمی ٹیم نے سری لنکا کے شہر کولمبو میں ہونے والی انٹر رجمنٹ والی بال چیمپئن شپ میں سری لنکا کے خلاف کامیابی حاصل کر کے ایونٹ کا ٹائٹل اپنے نام کیا۔ تقریب کے مہمان خصوصی سری لنکن آرمی والنٹیئر فورس کے کمانڈنٹ میجر جنرل چنا گونتلی کے تھے جنہوں نے جیتنے والے اور رنر اپ ٹیموں میں انعامات تقسیم کئے۔ پاکستان آرمی والی بال ٹیم نے تاریخ میں پہلی مرتبہ کسی غیر ملکی ایونٹ میں شرکت کی۔
