لاہور(سپورٹس رپورٹر+ نمائندہ سپورٹس) پاکستان کرکٹ ٹیم کے نئے ہیڈ کوچ مکی آرتھر آج بروز جمعرات کو اپنے عہدے کا چارج سنبھال لیں گے۔ قومی ٹیم کے کوچ بدھ اور جمعرات کی درمیانی شب سڈنی سے لاہور پہنچ گئے تھے۔ آج چیئرمین پی سی بی شہریار خان ، ٹیم مینجمنٹ، سلیکشن کمیٹی، ٹیسٹ اور ون ڈے ٹیموں کے کپتانوں سے ملاقات کے بعد پریس کانفرنس میں اپنے خیالات کا اظہار کرتے ہوئے مستقبل کے پلان کے حوالے سے بتائیں گے۔ پاکستان کرکٹ بورڈ نے ٹی ٹونٹی ورلڈ کپ میں قومی ٹیم کی ناقص کارکردگی کے بعد ہیڈ کوچ وقار یونس کو عہدے سے فارغ کر دیا تھا جس کے بعد نئے ہیڈ کوچ کی تقرری کے لیے کوششیں شروع کر دی گئی تھیں۔ پاکستان کرکٹ بورڈ کو موصول ہونے والی درخواستوں میں سے مکی آرتھر کے ساتھ پاکستان کرکٹ بورڈ کے معاملات طے پا گئے تھے۔ دو روز قبل مکی آرتھر نے اپنے آسٹریلوی پاسپورٹ پر پاکستان کا ویزا حاصل کیا۔