لاہور (نمائندہ سپورٹس + سپورٹس رپورٹر) پاکستانی فاسٹ بائولر جنید خان نے انگلینڈ کیلئے کھیلنے سے متعلق میڈیا رپورٹس کی تردید کردی ۔اپنے اہلخانہ کے ہمراہ ناران میں موجود جنید خان نے کہا کہ وہ دورہ انگلینڈ کیلئے منتخب نہ کیے جانے پر شدید مایوس ہیں تاہم انگلینڈ کیلئے کھیلنے سے متعلق خبریں درست نہیں۔انہوں نے کہا کہ ٹیسٹ اسکواڈ میں منتخب نہ کیے جانے پر وہ کچھ کاؤنٹیز سے چار روزہ کرکٹ کھیلنے کے لیے رابطے میں ہیں۔فاسٹ باؤلر نے بتایا کہ انگلش کاؤنٹی لینکاشائر کی انہیں کھلانے میں دلچسپی تھی تاہم وہ توقع کررہے تھے کہ انگلینڈ کے لیے اسکواڈ میں ان کا نام آجائے گا جس کے باعث انہوں نے کاؤنٹی سے معاہدہ نہیں کیا۔جنید نے کہا کہ وہ پاکستان سپر لیگ اور پاکستان اے کے لیے اچھی کارکردگی کا مظاہرہ کرچکے ہیں ٹیم میں آنے کے لیے انہیں اس کے علاوہ کیا کرنا پڑے گا ان کی سمجھ سے بالاتر ہے۔چیف سیلیکٹر انضمام الحق کے بیان جس میں ان کا کہنا تھا کہ جنید مکمل ردھم میں نہیں ہیں کے جواب میں فاسٹ باؤلر کا کہنا تھا کہ وہ مکمل فٹ ہیں اور کاکول میں لگنے والے فٹنس کیمپ میں اسے ثابت کرچکے ہیں۔انہوںنے کہاکہ ٹیم میں منتخب کیے بغیر وہ اپنی فارم اور فٹنس کس طرح ثابت کریں۔