قصور (نمائندہ نوائے وقت) پولیس تھانہ بی ڈویژن نے گھر والوں کے ساتھ مل کر بیوی پر تیل چھڑک کر آگ لگانے والے شوہر کو گرفتار کر لیا۔ کھڈیاں خاص کے رہائشی عبدالوحید نے مقدمہ درج کروایا میری بیٹی نادیہ کی شادی چوک قتل گڑھی قصور میں ڈیڑھ سال قبل محمد سلیم سے ہوئی، گھر میں اکثر لڑائی جھگڑا رہتا تھا، دو روز قبل میرے داماد محمد سلیم نے اپنی بہن نجمہ بی بی اور ماں سکینہ بی بی کے ساتھ ملکر اس پر تیل چھڑک کر آگ لگا دی جس سے میری بیٹی بری طرح جھلس گئی اور جناح ہسپتال میں زیرعلاج ہے۔ پولیس نے مقدمہ درج کر کے نادیہ کے خاوند محمد سلیم کو حراست میں لیکر تفتیش شروع کر دی تاہم پولیس کے مطابق محمد سلیم کے ہاتھ اور جسم بھی آگ سے جھلسا ہوا ہے اور محمد سلیم کے مطابق نادیہ نے خود کشی کی غرض سے اپنے آپ کو آگ لگائی تو میں نے اسکو بجھانے کی کوشش کی جس میں میرے ہاتھ اور جسم بھی متاثر ہوا ہے۔