اسلام آباد (نوائے وقت رپورٹ) وزیر اطلاعات پرویز رشید نے کہا ہے کہ عمران خان کی سیاست مردہ ہو چکی ہے، عمران خان انتخابات جیتنے کی پوزیشن میں نہیں، عمران خان کو خیبر پی کے میں بھی کوئی کامیابی نہیں ملی، ہمیں خوف نہیں احتساب کیلئے تیار ہیں۔ نجی ٹی وی سے گفتگو کرتے ہوئے انہوں نے کہا کہ وزیراعظم کی وطن واپسی کا فیصلہ ڈاکٹرز کی رائے سے ہو گا۔ ہوائی سفر کی اجازت ڈاکٹر نے دینی ہے۔ وزیراعظم لندن سے سیدھا پاکستان آئیں گے۔ انہوں نے ایک سوال پر کہا میری اور خورشید شاہ کے چیمبر کی دیوار ایک ہے۔ میری تربیت میں شامل ہے ہمیشہ جھک کر ملتا ہوں۔ آئندہ خورشید شاہ سے اور زیادہ جھک کر ملوں گا۔ انہوں نے کہا تبصرہ کرنا بلاول بھٹو کا حق ہے۔ انہوں نے بتایا کہ خورشید شاہ نے کھجوروں کا تحفہ بھیجا تھا، شکریہ ادا کرنے گیا تھا۔