کراچی (صباح نیوز)کراچی میں مختلف علاقوں میں فائرنگ سے ایک شخص جاں بحق اور ایک زخمی ہوگیا جبکہ پولیس نے مختلف علاقوں میں کارروائیوں میں 6ملزمان اور 5مشتبہ افراد حراست میں لے لیے۔ گلشن اقبال میں عوام نے دو ڈاکوئوں کو لوٹ مار کرتے ہوئے پکڑ لیا۔لیاری شاہ بیگ لین میں نامعلوم افراد کی فائرنگ سے ایک شخص جاں بحق ہوگیا جبکہ بہادر آباد میں بلوچ کالونی پل کے قریب دوران ڈکیتی مزاحمت پر محمد اسماعیل نامی شخص زخمی ہوگیا۔ دوسری جانب سعودآباد پولیس نے کارروائی کرتے ہوئے 2ملزموں اور 5مشتبہ افراد کو حراست میں لے لیا۔ سولجر بازار میں پولیس نے کارروائی کرتے ہوئے ایک ملزم کو گرفتار کرلیا۔ شارع فیصل پولیس نے کارروائی کرتے ہوئے 2ملزمان گرفتار کرلئے۔ پولیس کے مطابق گرفتار ملزمان صدیق عرف بلڈر اور میر حسن کے قبضے سے منشیات ، دو پستول اورگولیاں برآمد ہوئی ہیں۔ادھر محمودآباد پولیس نے کارروائی کرتے ہوئے سٹریٹ کرائم میں ملوث ملزم گرفتار کرلیا۔ پولیس کے مطابق ملزم عبدالوہاب کے قبضے سے ٹی ٹی پستول برآمد ہوئی ہے جبکہ گلشن اقبال کے علاقے میں واقع کے ڈی اے مارکیٹ میں لوٹ مار کرنیوالے دو ڈاکوں کو شہریوں نے رنگے ہاتھوں پکڑ لیا۔ شہریوں نے تشدد کے بعد ڈاکوئوں کو پولیس کے حوالے کردیا۔