رحیم یارخان (صباح نیوز) رحیم یار خان سے تعلق رکھنے والی او لیول کی طالبہ مالا علی نے نیشنل لینگئوسٹکس اولمپیڈ آف پاکستان 2015 میں پہلی پوزیشن حاصل کرلی ۔ اس کامیابی پر لینگئوسٹکس سوسائٹی آف پاکستان کی طرف سے مالا علی کو گولڈ میڈل سے نوازا گیا، اس کامیابی کے بعد مالا علی چودھویں انٹرنیشنل لینگئوسٹکس اولمپیڈ 2016 میں پاکستان کی نمائندگی کریں گی ۔ یہ ایونٹ بھارت کے شہر میسور میں 25 جولائی سے شروع ہوکر 29 جولائی کو اختتام پذیر ہوگا۔ مالا علی نے میڈیا سے گفتگو کرتے ہوئے کہا کہ میری کامیابی اللہ تعالیٰ کے کرم ، والدین کی دعائوں اور سکول کے اساتذہ کی محنت کا نتیجہ ہے۔ انشاء اللہ کامیابی حاصل کرکے اپنے ملک کا نام روشن کروں گی۔