لاہور (نامہ نگار) ملت پارک کے علاقہ میں گلی میں کار کھڑی کرنے کے جھگڑے پر محلے داروں کی فائرنگ سے 22 سالہ نوجوان ہلاک جبکہ 2 افراد زخمی ہو گئے۔ ملزمان ہوائی فائرنگ کرتے ہوئے فرار ہو گئے جبکہ علاقہ میں شدید خوف و ہراس پھیل گیا ہے۔ تفصیلات کے مطابق ملت پارک کے علاقہ بسطامی روڈ گلی نمبر 62 کے رہائشیوں نعمان اور پرنس وغیرہ کا گلی میں کار کھڑی کرنے پر محلے داروں طارق اور راجو سے جھگڑا ہو گیا جس پر دونوں گروپ گتھم گتھا ہو گئے جس کے بعد طارق وغیرہ گھر سے اسلحہ لے آئے اور طارق، راجو اور ان کے ساتھی کوکو نے اندھادھند فائرنگ کر دی جس کی زد میں آ کر 22 سالہ نعمان زخموں کی تاب نہ لاتے ہوئے موقع پر ہی دم توڑ گیا جبکہ صحافی نسیم قریشی کا بھائی پرنس اور کاظم شدید زخمی ہو گئے۔ ملزم ہوائی فائرنگ کرتے ہوئے فرار ہو گئے۔ اطلاع ملنے پر پولیس موقع پر پہنچ گئی، پولیس نے زخمی پرنس اور کاظم کو طبی امداد کیلئے ہسپتال پہنچا دیا جبکہ نعمان کی نعش قبضے میں لیکر پوسٹ مارٹم کیلئے مردہ خانے جمع کرا دی ہے۔ پولیس نے مقدمہ درج کرکے ملزموں کی تلاش شروع کردی ہے۔