اقوام متحدہ (نمائندہ خصوصی) اقوام متحدہ نے خبردار کیا ہے کہ میانمار میں روہنگیا مسلمانوں کیخلاف انسانی حقوق کی خلاف ورزیاں جاری رہیں تو انسانیت کے خلاف جرائم میں اضافہ ہوجائیگا۔ پیر کے روز جاری رپورٹ کے میں کہا گیا کہ میانمار میں روہنگیا مسلمانوں کیخلاف شہریت دینے سے انکار، زبردستی مزدوری کرانا اور جنسی تشدد سمیت کئی قسم کی انسانی حقوق کی خلاف ورزیاں جاری ہیں۔ یو این ہائی کمشنر فار ہیومین رائٹس زید راعد الحسین نے میانمار حکومت سے اقلیتوں سے منظم انداز میں ہونیوالے امتیازی سلوک برتے جانے کیخلاف موثر اقدامات کرنے کا مطالبہ کیاہے۔ رپورٹ کے مطابق شمالی راکھائن ریاست میں روہنگیا مسلمانوں کی زبردستی کی گرفتاریاں اور انہیں زیر حراست رکھنے کی کارروائیاں بڑھ رہی ہیں۔