لاہور(سپورٹس رپورٹر+نمائندہ سپورٹس) پاکستان ہاکی فیڈریشن اور سپانسر ادارے او جی ڈی سی کے اشتراک سے لاہور میں جاری فائیو اے سائیڈ ہاکی ٹورنامنٹ کے تیسرے روزاسلام آباد فائٹرز اور فیصل آباد فالکنز کی ٹیموں نے میچز جیت لئے جبکہ کراچی شارکس اور لاہور لائنز کا میچ برابر رہا۔ اسلام آباد فائٹرز اور کوئٹہ واریئرز کے درمیان کھیلے گئے میچ میں اسلام آباد ٹیم نے 5 کے مقابلے 7 گول سے کامیابی حاصل کی۔ اویس الرحمان نے تین، رضوان سینئر نے دو جبکہ وسیم اکرم اور راشد محمود نے ایک ایک گول سکور کیا۔ کوئٹہ کی جانب سے کاشف جاوید نے دو جبکہ شہریار، فیاض یعقوب، کاشف علی نے ایک ایک گول کیا۔ میچ کے اختتام پر ایم راشد کو بہترین کھلاڑی کا ایوارڈ دیا گیا۔ دوسرا میچ کراچی شارکس اور لاہور لائینز کے درمیان کھیلا گیا جو تین تین گول سے برابر رہا۔ کراچی کی جانب سے حسن انور نے دو جبکہ سکندر مصطفٰی نے ایک گول سکور کیا۔ لاہور کی جانب سے تینوں گول رانا سہیل ریاض نے کیے اور میچ کے بہترین کھلاڑی قرار پائے۔ تیسرا اور آخری میچ فیصل آباد فالکنز اور پشاور پینتھرز کے درمیان کھیلا گیا۔ جس میں فیصل آباد نے 2 کے مقابلے 8 گول سے کامیابی اپنے نام کی۔