حاصل پور+شکرگڑھ+ پاکپتن+ ملکہ ہانس (نامہ نگاران) حاصل پور‘ شکرگڑھ‘ پاکپتن‘ ملکہ ہانس میں 3 لڑکیوں اور خاتون سے زیادتی کی گئی۔ حاصل پور میں روزے کی حالت میں لڑکی سے زیادتی کی گئی۔ درندہ صفت اشخاص نے غریب مزدور کی 16سالہ لڑکی کو اغواء کر کے بے آبرو کیا‘ ملزمان دندناتے پھر رہے ہیں۔ پولیس گرفتار کرنے کی بجائے ملزموں کا ساتھ دے رہی ہے اگر انصاف نہ ملا تو خودکشی کر لونگا۔ 16سالہ لڑکی مصباح ولد منیر احمد قو م جٹ رہائشی 188مراد نے اپنے والد کے ہمراہ صحافیوں سے گفتگو کرتے بتایا گزشتہ دنوں اپنے گھر میں بیٹھی تھی ساجد علی ، محمد جمیل، محمد سلیم، عبدالخالق، اکرام ، محمد حسین وغیرہ میرے گھر زبردستی داخل ہو گئے اور کہا تمہاری والدہ کو دل کا دورہ پڑا ہے‘ ہمارے ساتھ چلو میں نے انکار کیا تو زبردستی اغواء کر کے اپنے ساتھ نامعلوم مقام پر لے گئے جہاں مجھے باری باری زیادتی کا نشانہ بناتے رہے۔ ملزمان کے بااثر ہونے کی وجہ سے پولیس انکے خلاف کارروائی کرنے سے قاصر ہے۔ میرے ساتھ روزے کی حالت میں زبردستی کرنے والے ملزمان کو سیاسی پشت پناہی حاصل ہونے کی وجہ سے پولیس انہیں گرفتار نہیں کر رہی ملزمان گرفتار نہ ہونے پر شدید احتجاج کرتے ہیں۔ شکرگڑھ میں تھانہ چک امرو کی حدود میں واقع سرحدی گائوں کریل دیلو میں اوباش نے بھیڑ بکریاں چرانے کے لئے گھر سے آئی ہوئی 14 سالہ لڑکی کو زبردستی بے آبرو کر دیا۔ پولیس رپورٹ کے مطابق موضع کریل دیلو کے غریب محنت کش محمد صفدر نے اپنی بیٹی علینا بی بی کو بھیڑ بکریاں چرانے کے لئے کھیتوں اور قبرستان کی طرف بھیجا وہاں اسد علی ولد خالد لڑکی کو زبردستی قبرستان میں لے گیا۔ علاوہ ازیں پاکپتن، ملکہ ہانس میں اوباشوں نے کمسن لڑکی اور خاتون کو زیادتی کا نشانہ بنا ڈالا۔ گاؤں شمس آباد کے رہائشی منصف خان کی بھتیجی حالاں بی بی کو ملزمہ مدیحہ بی بی نے بلایا اور کہا بازار جانا ہے جہاں خاتون کو لے جا کر ملزم شمروز کے حوالے کر دیا جس نے زیادتی کا نشانہ بنایا ساتھی منیر احمد پہرہ دیتا رہا۔ ملکہ ہانس کے موضع بارہ کوٹ نور احمد کا محنت کش محمد صدیق مزدوری کے سلسلہ میں گھر سے باہر گیا تھا اوباش واپڈا اہلکار نسیم، محمد طفیل اور وقار اشرف اور اسکے ساتھی اسلحہ کے زور پر گھر داخل ہو گئے اور کمسن بیٹی عذرا کو زیادتی نشانہ بنا ڈالا۔