پیرس (سپورٹس ڈیسک) فرانس میں جاری یورو کپ 2016 فٹبال ٹورنامنٹ کے ناک آئوٹ مرحلے میں گزشتہ روزکھیلے جانے والے میچ میں بیلجیئم نے ہنگری کو شکست دے کر کوارٹر فائنل میں جگہ بنا لی ہے۔ٹالوس کے سٹیڈیم میونسپل میں کھیلے جانے والے میچ میں بیلجیئم نے ہنگری کو چار صفر سے شکست دی۔بیلجیئم کے کپتان ایڈن ہیزرڈ نے کامیابی حاصل کرنے کے بعد کہا کہ یہ ایک بڑی گیم تھی اور ہم فتح کے حقدار تھے۔ انھوں نے کہا کہ ہم مزید گول کر سکتے تھے لیکن کیپر نے ایسا ممکن نہیں ہونے دیا۔کوارٹر فائنل میں جمعے کو بیلجیئم کا مقابلہ ویلز سے ہوگا۔کھیل کے دسویں منٹ میں بیلجیئم کی ٹیم کی جانب سے ایلڈرویئرلڈنے پہلا گول سکور کیا۔78ویں منٹ میں باتسوآئی نے دوسرا گول کیا جبکہ اگلے ہی منٹ میں کپتان ہیزرڈ نے تیسرا گول بنا ڈالا۔کھیل کے 91ویں منٹ میں کارکیسکو نے چوتھا گول کیا جو اس میچ کا آخری گول تھا۔ہنگری کے کوچ برنڈ سٹورک نے بیلجیئم کی کامیابی پر اسے مبارکباد دی اور کہا کہ یقینا وہ کامیابی کے حقدار تھے۔ ان کا کہنا تھا کہ سیکنڈ ہاف میں ان کی ٹیم نے بہت کوشش کی لیکن کامیاب نہیں ہو سکے تاہم انہوں نے یہ بھی کہا کہ وہ اس ٹورنامنٹ میں اپنی ٹیم کی مجموعی کارکردگی پر خوش ہیں۔پیرس میں منعقدہ یوروکپ کے اہم میچ میں اٹلی نے دفاعی چیمپئن سپین کو 2-0 سے شکست دے کر بڑا اپ سیٹ کر دیا۔ اٹلی کی جانب سے جارجیو اور پیلے نے گول کئے۔ کوارٹرفائنل میں جرمنی سے مقابلہ ہو گا۔