مظفرآباد (آئی این پی)وفاقی وزیر اطلاعات ونشریات سینیٹر پرویز رشید نے کہاہے پاکستان کی تعمیر و ترقی کی ہر اینٹ پر نواز شریف کا نام کندہ ہے، وزیراعظم نے آزادکشمیر کے لئے منشور کمیٹی تشکیل دی تھی، منشور کے ایک ایک لفظ پر عمل کیا جائے گا، آزادکشمیر میں ترقیاتی کاموں کے وعدے پورے کریں گے ، عمران بتائیں کیا خیبر پی کے میں چوہوں کا ڈانس ختم ہو گیا یا جاری ہے، بلاول بھٹو بتائیں ان کی حکومت نے آزادکشمیر کے عوام کو کیا دیا،عبد الستار ایدھی عظیم پاکستانی تھے۔ انہوں نے دکھی انسانیت کی خدمت کی، پوری دنیا میں ان کو خراج عقیدت پیش کیا جا رہا ہے۔ یہاں میڈیا سے بات چیت کرتے ہوئے انہوں نے کہا پیپلزپارٹی نے اپنے دور میں کوئی میگا پراجیکٹ شروع نہیں کیا، جب ہم نے حکومت سنبھالی تو ملک اندھیروں میں ڈوبا ہوا تھا۔ انہوں نے کہا کبھی 16 اور کبھی 22 مہینے اقتدار ملا لیکن ترقیاتی کام رکنے نہیں دیئے۔