ممبئی(سپورٹس ڈیسک) پاکستانی نژاد برطانوی باکسر عامر خان نے بھارتی باکسر وجندر سنگھ کو انتباہ کیا ہے کہ وہ مجھے چیلنج کر کے اپنا کیریئر تباہ نہ کرے کیونکہ مقابلہ ہوا تو وہ ان سے کسی صورت جیت نہیں سکتا۔ دومرتبہ کے عالمی چیمپئن پاکستانی نژاد برطانوی باکسر کا کہنا تھا کہ وجندر سنگھ میرا اچھا دوست ہے۔ ابھی تک وہ باکسنگ کے میدان میں ناتجربہ کار اور نوآموز ہے۔ابھی اس کھیل میں اسے بہت زیادہ تجربے کی ضرورت ہے۔ اگر وجندر سنگھ کے ساتھ میرا مقابلہ ہوگیا تو میںباکسنگ رنگ میں وجندر سنگھ کا مستقبل تاریک کردوں گا لیکن اس کے باوجود میں اس کی حوصلہ افزائی کرتارہوں گا۔واضح رہے کہ حال ہی میں ڈبلیو او ایشیا سپر مڈل ویٹ کا ٹائٹل جیتنے والے بھارتی باکسر وجندر سنگھ نے عامر خان کو چیلنج کرتے ہوئے کہا کہ وہ مے ویدر کو چھوڑیں اور اپنے روایتی حریف سے مقابلہ کریں۔