لاہور (نمائندہ سپورٹس/ سپورٹس رپورٹر) نوائے وقت گروپ کے ہیومن ریسورس ڈیپارٹمنٹ کے زیرانتظام ہونے والے سپورٹس گالا میں بیڈمنٹن چیمپئن شپ مرتضی ڈار اور حافظ زین علی کے نام رہی۔ انہوں نے فائنل میں ہشام یوسف اور عمیر نعیم پر مشتمل جوڑی کو شکست دی۔ وقت نیوز کے مرتضی ڈار اور زین علی نے سیمی فائنل میں ندیم بسرا اور طارق محمود جبکہ ہشام یوسف اور عمیر نعیم نے سیمی فائنل میں قیصر ندیم اور مقدس شہزاد پر مشتمل جوڑی کو ہرا کر فائنل میں جگہ بنائی تھی۔ اس موقع پر سلیم بخاری‘ بلال محمود‘ ندیم صدیقی اور شفیق سلطان کے مابین نمائشی میچ بھی کھیلا گیا۔ فاسٹ مارکیٹنگ‘ کوکا کولا‘ ایس اے گارڈن‘ سٹی گارڈن اور فریش جوس کے تعاون ہونے والے اس سپورٹس گالا کے بیڈمنٹن ایونٹ میں سٹاف ممبران کی بڑی تعداد بھی کھلاڑیوں کی حوصلہ افزائی کے لئے موجود تھی۔ اس موقع پر نوائے وقت گروپ کی مینجنگ ڈائریکٹر رمیزہ مجید نظامی نے کھلاڑیوں میں انعامات تقسیم کئے۔ بیسٹ انٹرٹینر کی ٹرافی قیصر ندیم کے حصے میں آئی۔ بیڈمنٹن ایونٹ میں اکیس ٹیموں کے بیالیس کھلاڑیوں نے اپنی صلاحیتوں کے جوہر دکھائے۔ سپورٹس گالا کے آخری مرحلے میں منگل کے روز خیابان امین کرکٹ گراؤنڈ میں نوائے وقت‘ دی نیشن‘ وقت نیوز اور مختلف شعبوں کی کرکٹ ٹیموں کے علاوہ ویٹرنز کرکٹ ٹیموں کے میچز کھیلے جائیں گے۔