لاہور (سپورٹس رپورٹر + نمائندہ سپورٹس) کرکٹرز کے ہائی پرفارمنس کیمپ کا آغاز این سی اے میںہوگیا ، منتخب کھلاڑیوں نے گزشتہ شب رپورٹ کردی،کھیل کے تینوں شعبوں میں صلاحیتیں نکھارنے کیلئے کام کیا جائیگا،3 وکٹ کیپرز بھی توجہ کا مرکز ہوں گے۔تفصیلات کے مطابق ڈائریکٹر نیشنل کرکٹ اکیڈمیز مدثر نذر نے عہدے کا چارج سنبھالنے کے بعد مستقبل کیلئے کرکٹرز کی کھیپ تیار کرنے کا ارادہ ظاہر کیا تھا، 31 کھلاڑیوں مدعو ہیں۔ اس مقصد کیلئے نیشنل کرکٹ اکیڈمی میں شیڈول کیا گیا ہائی پرفارمنس کیمپ شروع ہوگیا ہے ، منتخب31کھلاڑیوں میں شعیب ملک، بابر اعظم، عماد وسیم، صہیب مقصود، محمد عرفان، عمر گل، جنید خان، امام الحق، انور علی، احسان عادل، شرجیل خان، فخر زمان، سعود شکیل، محمد نواز، حسن علی، محمد اصغر، بلاول بھٹی، عماد بٹ، عامر یامین، عزیز اللہ، محمد عباس، شاداب خان، امیر حمزہ شامل ہیں۔ حیات اللہ، ذیشان ملک، حسن رضا، رومان رئیس، ضیا الحق، محمد حسن، سیف اللہ بنگش اور بسم اللہ خان شامل ہیں، 3ہفتے کے کیمپ میں سینئرز کی فارم اور فٹنس بہتر بنانے کیلئے کام کیا جائیگا، دوسری جانب کوچز جونیئرز کی صلاحیتیں نکھارنے کی کوشش کرینگے۔ذرائع کا کہنا ہے کہ بیٹسمینوں کا فٹ ورک بہتر بنانے کیلئے خاص طور پر ٹریننگ کروائی جائے گی، اسپنرز کے بولنگ ایکشن کا بھی باریک بینی سے جائزہ لیا جائے گا، اچھا آل رائونڈز بننے کی صلاحیت رکھنے والے کرکٹرز کا کھیل نکھارنے کیلئے بھی کام ہوگا، 3وکٹ کیپرز محمد حسن، سیف اللہ بنگش اور بسم اللہ خان پر خاص توجہ ہوگی،کیمپ کے دوران سلیکٹرز انگلینڈ کیخلاف ون ڈے سیریز کے ممکنہ کھلاڑیوں کی کارکردگی پر بھی نظر رکھیں گے۔ تاہم شعیب اور عماد کیمپ سے غیر حاضر رہے۔