اسلام آباد (آئی این پی) اسلام آباد کے بے نظیر انٹر نیشنل ایئرپورٹ پر قومی ایئر لائن کی پرواز لینڈنگ کے دوران رن وے پر پھسل گئی تاہم خوش قسمتی سے طیارے میں سوار تمام مسافر محفوظ رہے۔ پیر کوترجمان پی آئی اے کا کہنا ہے کہ ٹیک آف کے بعد فنی خرابی کی نشاندہی پر پائلٹ نے دوبارہ لینڈنگ کی تاہم طیارہ رن وے سے اتر کر کچے میں چلا گیا۔ معاملے کی تحقیقات کا آغاز کردیا گیا ہے۔ ذرائع کا کہنا تھا کہ طیارہ ایئرپورٹ کے رن وے سے ٹیک آف نہ کرسکا تھا اور پرواز سے قبل ہی طیارے کا ہائیڈرالک سسٹم فیل ہو گیا تھا۔ذرائع کے مطابق سول ایوی ایشن کے عملے نے کئی گھنٹوں کی کوششوں کے بعد طیارے کو کچے سے ہٹایا تاہم اس دوران ایئرپورٹ کا رن وے بند کردیا گیا جس سے متعدد پروازیں تاخیر کاشکار ہوئیں۔