بہاولپور (نامہ نگار) نامعلوم موٹر سائیکل سواروں نے اندھادھند فائرنگ کرکے سی ٹی ڈی کے اے ایس آئی کو شہید کر دیا۔ بتایا جاتا ہے کہ اے ایس آئی اللہ دتہ پیر کی صبح نوشہرہ جدید سے موٹر سائیکل پر ڈیوٹی پر بہاولپور آ رہا تھا کہ خانقاہ شریف کے قریب 2نامعلوم موٹر سائیکل سواروں نے اس پر اندھادھند فائرنگ کر دی جس کے نتیجہ میں وہ موقع پر ہی دم توڑ گیا۔ پولیس نے اللہ دتہ کی نعش کو بہاولپور وکٹوریہ ہسپتال میں پوسٹمارٹم کے لئے منتقل کر دیا۔ سی ٹی ڈی کے ترجمان کے مطابق اے ایس آئی اللہ دتہ کو 12گولیاں لگیں۔ ملزمان کی ابھی تک شناخت نہیں ہو سکی۔ وقوعہ کا مقدمہ سی ٹی ڈی تھانہ ملتان میں درج کر لیا گیا ہے۔ اللہ دتہ نے پسماندگان میں بیوہ اور دو لے پالک بیٹیاں چھوڑی ہیں۔