لاہور (خبرنگار) پاکستان انٹرنیشنل ائیر لائنز کی پریمیئر سروس کے تحت پہلی پرواز لندن سے مقررہ وقت سے 15منٹ قبل لاہور ائیرپورٹ پر پہنچ گئی، سابق چیف جسٹس افتخار محمد چوہدری اور کرکٹر احمد شہزاد سمیت 222مسافر نئی پرواز کے ذریعے لاہور پہنچے،پی آئی اے کی پریمیئر پرواز لاہور سے لندن بھی روانہ ہو ئی جس میں وزیر ریلوے خواجہ سعد رفیق نے بھی سفر کیا،وہ عملے اور مسافروں سے گھل مل گئے۔ پریمئیر سروس کی پہلی پرواز کی لندن سے لاہور آمد پر پی آئی اے کے ڈائریکٹر مارکیٹنگ خرم مشتاق نے مسافروں کا استقبال کیا۔ سابق چیف افتخار محمد چوہدری نے کہا کہ اللہ کرے کہ پاکستان انٹرنیشنل ایئرلائنز اور ترقی کرے، دوران پرواز مہمان نوازی بہت اچھی تھی، تمام مسافر بہت خوش دکھائی دیئے۔ کرکٹر احمد شہزاد نے کہا کہ مجھے بہت کم موقع ملا ہے کہ قومی ایئرلائنز کی پروازوں پر غیر ملکی سفر کیا ہو، لندن سے لاہور سفر کے بعد تہیہ کر لیا ہے کہ آئندہ پی آئی اے ہی سے سفر کروں گا۔ بزنس کلاس کے مسافروں کو شاہانہ انداز میں سروس فراہم کی گئی۔ لاہور سے جانے والی پہلی پریمئیر پرواز کے ذریعے 266مسافروں نے لندن کے لیے سفر کیا۔دریں اثنا ء لاہور سے بھی پریمئر سروس شروع کردی گئی ہے ۔لاہور سے پی آئی اے کی اے بس 330ائیر بس 266مسافروں کو لے کر گزشتہ روز صبح گیارہ بجے لندن روانہ ہوئی ۔مسافروں کو پھول اور بچوں کو تحا ئف اور کھلونے دئیے گئے۔