لاہور(سپورٹس رپورٹر) جونیئر ورلڈ کپ کی تیاری کے لیے پاکستان جونیئر ٹیم کا ہالینڈ کا کامیاب دورہ اختتام پذیر ہو گیا۔ پاکستان ٹیم نے ہالینڈ میں بی سی ای انٹرنیشنل ہاکی ٹورنامنٹ اپنے نام کیا جس میں میزبان ملک کی ٹیم ای ایچ وی ہاکی کلب کے علاوہ دو جرمن ہاکی کلب بھی شامل تھے۔ پاکستان جونیئر ٹیم اس میں ناقابل شکست رہی۔ پاکستان ٹیم نے ٹورنامنٹ کے علاوہ تین میچز کھیلے اور ناقابل شکست رہی۔ پاکستان جونیئرز نے دورہ میں مجموعی طور پر 33 گول سکور کیے جبکہ ٹورنامنٹ میں 14 گول کیے جن میں بلال قادر نے تین، دلبر حسین، حسن انور اور شان ارشاد نے دو دو جبکہ شکیل عماد بٹ، ابوبکر، مبشر علی، فہد اور عتیق ارشد نے ایک ایک گول کیا۔ پاکستان جونیئر ٹیم دورہ کے اگلے مرحلے میں سپین راونہ ہو گئی جہاں وہ میزبان جونیئر ٹیم کے خلاف میچز کھیلے گی۔