لاہور(سپورٹس رپورٹر) پاکستان اور سپین کی جونیئر ٹیموں کے درمیان جاری تین ٹیسٹ میچوں کی سیریز کے دوسرے میچ میں پاکستان جونیئر کھلاڑیوں نے پنلٹی شوٹ آوٹ پر کامیابی حاصل کر کے سیریز میں کم بیک کرتے ہوئے مقابلہ ایک ایک سے برابر کر دیا ہے۔ٹریسا میں پاکستان اور سپین کی انڈر 21 ون ٹیموں کے درمیان سیریز کا دوسرا میچ گذشتہ روز کھیلا گیا۔ مقررہ وقت پر مقابلہ تین تین گول سے برابر رہا تاہم پنلٹی شوٹ آوٹ پر کامیابی حاصل کی۔ مقررہ وقت میں پاکستان ٹیم نے میچ میں ہر مرتبہ برتری حاصل کی جسے سپین نے برابر کر دیا۔ پاکستان کی طرف سے دلبر حسین نے دو جبکہ عتیق ارشد نے ایک گول سکور کیا۔ واضح رہے کہ پاکستان جونیئر ٹیم کو پہلے میچ میں تین دو سے شکست کا سامنا کرنا پڑا تھا۔ دونوں ٹیموں کے درمیان ٹیسٹ سیریز کا آخری میچ کل بروز جمعرات کو کھیلا جائیگا۔ ٗ