لاہور(سپورٹس رپورٹر) اظہر علی سے ون ڈے ٹیم کی قیادت چھینے جانے کا خدشہ پیدا ہوگیا، پی سی بی حکام نے انگلینڈ کیخلاف ون ڈے سیریز میں بدترین شکست کے بعد سرفراز احمد کو ایک روزہ قائد بنانے کی تیاری کرلی۔چیئرمین پی سی بی شہر یار خان اور چیئر مین پی سی بی ایگزیکٹو کمیٹی نجم سیٹھی انگلینڈ سے واپسی پر اہم فیصلے کرینگے ۔ مسلسل ناکامیوں کی وجہ سے قومی ٹیم کے کپتان اظہر علی نے اس فارمیٹ سے کنارہ کشی کر کے اپنے آپ کو ٹیسٹ کرکٹ تک محدود رکھنے کے بارے میں غور شروع کر دیا ہے۔اظہر علی نے کوئی بھی فیصلہ کرنے سے قبل اپنے دوستوں اور فیملی کے افراد سے مشاورت کرنا چاہتے ہیں۔ دوسری جانب پاکستان کرکٹ بورڈ کے اعلیٰ حکام نے اظہر علی کو اس حوالے سے کوئی بھی فوری فیصلہ کرنے سے روک دیا ہے۔