لاہور (خصوصی رپورٹر) حکومت پنجاب کے ترجمان زعیم قادری کی میڈیا سے گفتگو کے دوران زبان پھسل گئی۔ صحافی نے ان سے سوال کیا کہ عمران خان یا نوازشریف میں سے کون گھر جائے گا؟ اس پر انہوں نے کہاکہ نوازشریف تو میں نے کہہ دیا نااہل ہو جائیں گے‘ انشاء اللہ‘ صحافیوںکی طرف سے غلطی کا احساس دلانے پر زعیم قادری نے تصحیح کر لی اور کہاکہ نوازشریف رہیں گے خان 90 میں گھر چلے جائیں گے۔ الیکشن کمشن 90 دن میں عمران خان کو گھر بھیج دے گا اور وہ سیاست کے لئے نااہل ہو جائیں گے۔ بعدازاں انہوں نے میڈیا کی منت سماجت کی کہ چمڑے کی زبان ہے پھسل گئی میں نے عمران خان کہا ہے۔ دوسری جانب تحریک انصاف کے سیکرٹری اطلاعات سید صمصام بخاری نے کہا ہے کہ زعیم قادری کی زبان نہیں پھسلی بلکہ ان کے منہ سے سچ نکلا ہے کہ 90روز میں وزیراعظم اپنے عہدے پر نہیں رہیں گے۔