کراچی (نوائے وقت رپورٹ) ایم کیو ایم کے رہنما فیصل سبزواری کراچی پہنچ گئے۔ فیصل سبزواری کئی ماہ سے امریکہ میں مقیم تھے۔ نجی ٹی وی کے مطابق ایم کیو ایم کے رہنما خواجہ اظہار الحق نے کراچی ائرپورٹ پر فیصل سبزواری کا استقبال کیا۔ فیصل سبزواری نے فاروق ستار کی قیادت پر اعتماد کا اظہار کیا ہے۔ میڈیا سے گفتگو میں انہوں نے کہاکہ ایم کیو ایم پر مشکل وقت ہے اس لئے آیا ہوں۔ ایم کیو ایم کا مستقبل روشن ہے۔ میں اپنے مسائل حل کرکے وطن واپس آیا پہلے دن سے خواجہ اظہار الحق کے ساتھ ہوں شہر کی نمائندگی ایم کیو ایم کو ہی کرنی ہے۔ سیاست کرنا سب کا حق ہے‘ ہمارا کام ہے اپنی پارٹی کو مضبوط بنا کر شہر کے مسائل کو حل کرنا‘ ایک صحافی نے فیصل سبزواری سے سوال کیا کہ منزل چاہئے یا رہنما؟ جس پر فیصل سبزواری نے کہاکہ ابھی تو بھوک لگی ہے کھانا اور گاڑی چاہئے۔فیصل سبزواری نے متحدہ کے عارضی دفتر میں فاروق ستار اور دیگر سے ملاقات کی اس موقع پر فاروق ستار نے کہا کہ ملک کی چوتھی نمبر جماعت کو سینے سے لگانا چاہئے سبزواری پارٹی کی اجازت سے باہر گئے تھے کسی خوف کی وجہ سے نہیں۔ عید کے بعد ماحول ٹھیک ہو جائیگا۔