جیکب آباد (نوائے وقت نیوز+صباح نیوز) جیکب آباد میں مسلح افراد نے گھر میں گھس کر فائرنگ کردی جس کے نتیجہ میں ایک ہی خاندان کے چار افراد جاں بحق ہوگئے۔ پولیس کیمطابق کوٹ عبدالحمید کے رہائشی عبدالرشید اور اس کے اہل خانہ گھر میں سو رہے تھے۔ اس دوران 12سے زائد مسلح افرا د نے گھر میں گھس کر فائرنگ کردی۔ فائرنگ سے عبدالرشید، اسکے دو بیٹے عنایت، ولی محمد اور اسکی کمسن پوتی سمیرا جاں بحق ہوگئی۔ فائرنگ کے بعد ملزمان فرار ہوگئے۔ پولیس کا کہنا ہے کہ واقعہ بانبن برادری کے دوگروپوں میں پرانی دشمنی کی وجہ سے پیش آیا۔