لاہور(سپورٹس رپورٹر) پاکستان کرکٹ ٹیم کے فاسٹ بائولر محمد عامر کی شادی کے سلسلہ میں گذشتہ روز رسم حنا کی مشترکہ تقریب منعقد ہوئی جس میںدولہا اور دلہن کے خاندان کے افراد نے شرکت کی۔ لاہور کے بیدیاں روڈ پر واقع نجی فارم ہاوس کو خوبصورتی سے سجایا گیا تھا جبکہ نوجوان لڑکوں نے جامنی کلر کی قمیضیں اور سفید شلواریں زیب تن کر رکھی تھیں۔ محمد عامر کے گھر والے جب مہندی لیکر فارم ہاوس پہنچے تو اس موقع پر نوجوانوں نے ڈھول کی تھاپ اور ڈی جے کے میوزک پر خوب بھنگڑے ڈالے۔ بعد ازاں محمد عامر جنہوں نے سبز رنگ کی شلوار قمیض کے ساتھ سبز رنگ کی ہی واسکٹ زیب تن کر رکھی تھی جبکہ دلہن کو ڈولی میں لایا گیا جسے پھولوں سے سجایا گیا تھا۔ دلہن نے اورنج کلر کا سوٹ اور سبز ڈوپٹہ اوڑھ رکھا تھا۔ دلہن کی ڈولی کے اس کے رشتہ داروں نے اٹھا رکھا تھا۔ بعد ازاں دولہا اور دلہن کو سٹیج پر بٹھا کر مہندی کی رسم پوری کی گئی جس میں رشتہ داروں نے بھی حصہ لیا۔