لاہور(سپورٹس رپورٹر) پاکستان کرکٹ بورڈ ویمن ونگ نے دوسری انڈر 17 نیشنل سکول چیمپئن شپ کے شیڈول کا اعلان کر دیا ہے۔ 25 ستمبر سے 4 اکتوبر تک کنٹری کلب مریدکے میں چیمپئن شپ کے میچز کھیلے جائینگے۔ٹی ٹونٹی فارمیٹ کے تحت کھیلے جانے والے ٹورنامنٹ میں بارہ ٹیمیں شریک ہونگی جنہیں تین گروپس میں تقسیم کیا گیا ہے۔ پول اے میں لاہور، پشاور، ملتان اور حیدر آباد۔ گروپ بی میں کراچی، راولپنڈی، سیالکوٹ اور کوئٹہ جبکہ پول سی میں اسلام آباد، فیصل آباد، ایبٹ آباد اور بہاولپور شامل ہیں۔ ٹورنامنٹ میں شرکت کے لیے ٹیموں کی آمد کا سلسلہ کل بروز جمعہ 23 ستمبر سے شروع ہو جائے گا۔