عمان (نیٹ نیوز) توہین مذہب کے الزام میں گرفتار اردن کے متنازعہ مصنف نہدہتار کو عدالت کے باہر مسلح شخص نے فائرنگ کرکے قتل کردیا۔ رائٹرز کے مطابق نہدہتار توہین مذہب کے الزام میں عدالت میں پیشی کے لئے جارہا تھا جب اس پر حملہ کیا گیا، جبکہ حملہ آور کو گرفتار کرلیا گیا۔ عیسائی مذہب سے تعلق رکھنے والے نہدہتار نے سماجی رابطوں کی ویب سائٹ پر ایک متنازعہ کارٹون پوسٹ کیا تھا جسے توہین مذہب قرار دے کر گزشتہ ماہ انہیں گرفتار کرلیا گیا تھا۔ اردنی حکام کا مو¿قف تھا یہ خاکہ شیئر کرکے نہدہتار نے قانون کی خلاف ورزی کی جبکہ مذہبی حلقے بھی اس سے سخت نالاں تھے۔ واضح رہے 56 سالہ نہدہتار کو اسلام مخالف اور شامی صدر بشارالاسد کا حامی سمجھا جاتا تھا۔ اردن کی سرکاری نیوز ایجنسی پیٹرا نے ذرائع کے حوالے سے بتایا عدالت کی سیڑھیوں پر انہیں تین گولیاں لگیں۔ دو عینی شاہدین نے بتایا کہ حملہ آور کی داڑھی تھی اور اس کی عمر تقریباً 50 برس کے قریب ہوگی۔ عینی شاہدین نے مزید بتایا حملہ آور شخص روایتی عرب لباس دشداشہ پہنا ہوا تھا اور زیادہ تر اردنی مسلمان یہ لباس زیب تن کرتے ہیں۔ یاد رہے نہدہتار نے کہا تھا کہ ان کا مقصد کسی مذہب کی توہین نہیں تھا۔
اردنی مصنف
ہنگری کے دارالحکومت میں بم دھماکہ، 2 پولیس افسر زخمی
بڈاپسٹ (اے ایف پی) ہنگری کے دارالحکومت بڈاپسٹ میں بم دھماکے سے 2 پولیس افسر زخمی ہوگئے۔ پولیس کے مطابق دھماکے سے قبل ایک شخص عمارت کے اندر بیگ چھوڑ گیا تھا۔ دھماکے سے عمارت کو نقصان پہنچا اور کار کے شیشے ٹوٹ گئے۔ دھماکے کی آواز دُور دُور تک سنی گئی۔ پولیس نے دھماکے کے بعد علاقے میں انکوائری شروع کردی۔ ہنگری میں دھماکہ ایسے وقت پر ہوا ہے جب ملک کے اندر غیر قانونی تارکین وطن کے حوالے سے ریفرنڈم ہونے والا ہے۔
ہنگری / دھماکہ