لاہور (سپورٹس رپورٹر+نمائندہ سپورٹس) پاکستان اور ویسٹ انڈیز کی کرکٹ ٹیموں کے درمیان تیسرا اور آخری ٹی 20 انٹرنیشنل (آج) منگل کو ابوظہبی میں کھیلا جائے گا۔ پاکستانی شائقین یہ میچ پاکستان کے معیاری وقت کے مطابق رات 9 بجے دیکھ سکیں گے۔ گرین شرٹس کو سیریز میں 2-0 کی فیصلہ کن برتری حاصل ہے۔ قومی ٹیم ویسٹ انڈیز کیخلاف کلین سویپ کیلئے پرعزم ہے۔ پہلے میچ میں پاکستان نے 9 وکٹ اور دوسرے میچ میں 16 رنز سے فتح حاصل کرکے سیریز اپنے نام کی۔ واضح رہے کہ دونوں ٹیموں کے درمیان ٹی ٹونٹی سیریز کے بعد تین ون ڈے میچوں کی سیریز کا پہلا میچ 30 ستمبر کو شارجہ، دوسرا میچ 2 اکتوبر کو شارجہ جبکہ تیسرا اور آخری میچ 5 اکتوبر کو ابوظہبی میں کھیلا جائیگا۔ ون ڈے سیریز کے علاوہ دونوں ٹیموں کے درمیان تین ٹیسٹ میچز بھی کھیلے جائینگے اس سلسلے میں پہلا ٹیسٹ 13 سے 17 اکتوبر تک دبئی، دوسرا ٹیسٹ 21 سے 25 اکتوبر تک ابوظہبی جبکہ تیسرا اور آخری ٹیسٹ میچ 30 اکتوبر سے 3 نومبر تک شارجہ میں کھیلا جائیگا۔