لاہور (سٹاف رپورٹر) اچھرہ میں شوہر کے مبینہ تشدد سے بیوی ہلاک ہوگئی، مقتولہ کے والد کی مدعیت میں مقدمہ درج کرکے شوہر کو گرفتار کرلیا گیا۔ معلوم ہوا ہے کہ اچھرہ میں 30 سالہ سندس کی تین سال قبل شہباز سے شادی ہوئی تھی، میاں بیوی میں جھگڑا رہتا تھا چند روز قبل بھی جھگڑا ہوا اور پھر صلح کروا دی گئی۔ گذشتہ روز سندس ہسپتال پہنچ گئی لڑکی کے اہل خانہ کا کہنا ہے کہ لڑکی کو خاوند اور سسرالیوں نے تشدد کا نشانہ بنایا جس سے اس کی موت ہوئی جبکہ سسرالیوں کا کہنا ہے کہ لڑکی کی موت طبعی ہے۔ پولیس نے مقدمہ درج کرکے خاوند شہباز کو حراست میں لے لیا۔ پولیس کا کہنا ہے کہ بظاہر لگتا ہے کہ خاتون کی موت تشدد سے ہوئی ہے تاہم پوسٹمارٹم رپورٹ آنے کے بعد حقائق سامنے آسکیں گے۔