فیصل آباد (نمائندہ خصوصی) صدر کے علاقہ میں خاتون سمیت چار نامعلوم افراد نے گھر میں گھس کر میاں بیوی کو گولیاں مار کر قتل کر دیا ‘ دوہرے قتل کی واردات پر علاقہ کی فضا سو گوار ہو گئی ‘موقع پر سینکڑوں لوگ جمع ہو گئے ‘ پولیس نے نعشیں تحویل میں لے کر پوسٹمارٹم کیلئے ہسپتال منتقل کرکے کارروائی شروع کر دی۔ تفصیلات کے مطابق تھانہ صدر کے علاقہ جڑانوالہ روڈ ڈھڈی والا آخری سٹاپ کریم نگر کا رہائشی 25سالہ ساجد اپنی 20سالہ اہلیہ ارشاد بی بی کے ہمراہ گھر میں سو رہا تھا کہ گزشتہ علی الصبح چار نا معلوم افراد اس کے گھر میں گھس آئے اور فائرنگ کرکے دونوں میاں بیوی کو قتل کردیا اور با آسانی فرار ہو گئے۔ فائرنگ کی آواز سن کر اہل محلہ موقع پر جمع ہوئے تو دونوں میاں بیوی کو خون میں لت پت مردہ حالت میں پایا۔ اطلاع پر پولیس کی بھاری نفری موقع پر پہنچ گئی اور نعشیں تحویل میں لے کر پوسٹمارٹم کیلئے الائیڈ ہسپتال منتقل کرکے کارروائی شروع کر دی۔ پولیس کے مطابق ملزموں میں ایک خاتون بھی شامل تھی۔ موقع سے شواہد اکٹھے کر لئے ہیں۔ مقدمہ کے بعد ہی دوران تفتیش اصل حقائق سامنے آئیں گے ۔