راولپنڈی (آن لائن + نوائے وقت رپورٹ) عوامی مسلم لیگ کے سربراہ شیخ رشید نے کہا ہے پرویز رشید کے استعفیٰ سے نواز شریف کو 10 شدت کے زلزلے کا جھٹکا لگا ہے۔ وقت بہت قریب ہے نااہل لوگوں کا صفایا ہو گا۔ قومی راز فاش کرنے والے انجام تک پہنچیں گے۔ ویڈیو پیغام میں انہوں نے کہا نواز شریف کو بھی قربانی دینا ہو گی۔ ابھی نواز شریف نے اپنا صدقہ کیا ہے۔ عنقریب جشن ہو گا سیاسی مردے دفن ہوں گے نااہل اور نکمے لوگوں کو اٹھا کر باہر پھینکنے کا وقت بہت قریب ہے۔ قومی سلامتی کے راز فاش کرنے والوں کو انجام تک پہنچائیں گے۔ مزید برآں چودھری نثار کی پریس کانفرنس کے ردعمل میں انہوں نے کہا چودھری نثار کی پریس کانفرنس سن کر دکھ ہوا میرے پاس تو صرف ایک ہی سگار ہے۔ چودھری نثار شریف خاندان کی ضد کی بھینٹ چڑھ رہے ہیں، فوج ملکی سلامتی پر کوئی سمجھوتہ نہیں کرتی، پرسوں ہونے والی میٹنگ کا ماحول بہت ترش اور گرم تھا، ایسا نہیں تھا تو جے آئی ٹی کیوں بنائی گئی۔ پرویز رشید میں اتنی اہلیت نہیں وہ خبر لگوا سکے، پرویز رشید وزیراعظم نواز شریف کے کہنے پر خبر لگوا اور رکوا سکتے ہیں۔ اس معاملے پر نواز شریف کے خاندان اور سرکاری افسروں کا نام آرہا ہے۔ٹیلیفون پر نامعلوم مقام سے گفتگو کرتے ہوئے شیخ رشید نے کہا کہ ابھی کہاں موجود ہوں یہ نہیں بتا سکتا اور نہ ہی لال حویلی جاسکتا ہوں۔