اسلام آباد (سٹاف رپورٹر) چیف آف آرمی سٹاف جنرل راحیل شریف نے کہا ہے کہ فرنٹیئر ورکس آرگنائزیشن ایک سٹرٹیجک آرگنائزیشن میں تبدیل ہوچکی ہے جس نے فوج کی طرف سے قومی اہمیت کے منصوبوں کی تکمیل میں مرکزی کردار ادا کیا ہے۔ آئی ایس پی آر کے مطابق جنرل راحیل نے ایف ڈبلیو او کے قیام کی گولڈن جوبلی تقریبات سے خطاب کرتے ہوئے کہا کہ پن بجلی کے متعدد اہم منصوبوں، کان کنی کے منصوبوں‘ قراقرم ہائی وے‘ وزیرستان میں ایک ہزار کلومیٹر طویل اقتصادی راہداری بھی اسی ادارے کے اہم کارناموں کے چند نمونے ہیں۔ انہوں نے مختلف قومی منصوبوں کے دوران اپنی جانیں قربان کرنے والے ایف ڈبلیو او کے 1300 افسران اور اہلکاروں کو خراج عقیدت پیش کیا۔