سلطان آف جوہر جونیئر ہاکی ٹورنامنٹ: پاکستان کو آسٹریلیا نے 8-1 سے ہرا دیا
لاہور (سپورٹس رپورٹر+ نمائندہ سپورٹس) سلطان آف جوہر جونیئر ہاکی ٹورنامنٹ میں پاکستان ٹیم کو اپنے چوتھے میچ میں آسٹریلیا کے ہاتھوں بڑے مارجن سے شکست کا سامنا کرنا پڑا ہے۔ جوہر بارو ہاکی سٹیڈیم ملائیشیا میں کھیلے جا رہے ٹورنامنٹ میں گذشتہ روز پوائنٹس ٹیبل پر سات سات پوائنٹس کے ساتھ پہلی اور دوسری پوزیشن کی ٹیموں آسٹریلیا اور پاکستان کے درمیان میچ کھیلا گیا جس میں آسٹریلیا نے یکطرفہ ایک کے مقابلے 8 گول سے کامیابی سمیٹی۔ پاکستان ٹیم ک یجانب سے واحد گول کھیل کے پہلے ہاف میں ہی کیا گیا۔ جبکہ آسٹریلیا کو پہلے ہاف میں چار ایک سے برتری حاصل تھی۔ آسٹریلیا کی جانب سے ٹام کریج نے ہیٹ ٹرک جبکہ ریان پروکٹر نے دو گول سکور کیے۔ اس میچ میں آسٹریلوی ٹیم کا دفاع انتہائی مضبوط تھا جنہوں نے پاکستان کھلاڑیوں کو پوری طرح مارک کیے رکھا۔ پاکستان کا میچ میں واحد گول عتیق ارشد نے 25 ویں منٹ میں کیا۔ پاکستان ٹیم ٹورنامنٹ میں اپنا آخری لیگ میچ جاپان کے خلاف کھیلے گی۔
