اسلام آباد (آن لائن) پاک ترک سکول نیٹ ورک کے طلبہ ، اساتذہ اور عملے نے اسلام آباد میں احتجاجی مظاہرہ کیا ۔ مظاہرین نے پاک ترک سکولز کے عملے کے ویزوں میں توسیع کا مطالبہ کر دیا ۔ تفصیلات کے مطابق ہفتے کے روز اسلام آباد میں پاک ترک سکولز نیٹ ورک کے عملے ، طلبہ اور اساتذہ نے احتجاجی مظاہرہ کیا ۔ احتجاجی مظاہرے میں طلبہ کے والدین بھی شریک ہوئے۔ مظاہرین نے ہاتھوں میں بینرز اور کتبے اٹھا رکھے تھے جن پر پاک ترک سکول کے حق اور اساتذہ کو زبردستی ملک چھوڑنے کے خلاف نعرے درج تھے ۔ مظاہرے میں شریک طلبہ کے والدین نے کہاکہ حکومت اس طرح طلبہ کے مستقبل سے نہیں کھیلیں۔ پاک ترک سکولز کے عملے کے ویزوں میں توسیع کی جائے۔ طلبہ کا مستقبل دائو پر لگا دیا گیا ہے۔ مظاہرین نے کہا کہ جب تک عملے کے ویزوں کی مدت میں توسیع نہیں کی جاتی تب تک احتجاج جاری رہے گا۔