واشنگٹن(آئی این پی ) نو منتخب امریکی صدر ڈونلڈ ٹرمپ نے قومی تہوار کے موقع پر جاری کردہ ویڈیو پیغام میں کہا ہے کہ وہ ان تمام افراد کے شکر گزار ہیں جنہوں نے انہیں کامیاب بنا یا اوراب وہ امریکہ کو ایک کامیاب ملک بنائیں گے۔نو منتخب صدر نے قومی تہوار یومِ شکرانہ (تھینکس گیونگ ڈے) کے موقع پرٹویٹرپرجاری کردہ ویڈیو پیغام میں امریکہ اور تمام امریکیوں کا شکریہ ادا کیا۔ا نہوں نے ویڈیو کے کیپشن میں لکھا جو کچھ بھی ہمارے پاس ہے ہم سب کو اس کے لیے شکرگزار ہونا چاہئے اور باہمت طریقے سے آنے والے مستقبل کا سامنا کرنا چاہئے۔ آپ سب کو یومِ شکرانہ مبارک ہو۔ان کا کہنا تھا ہمیں امریکہ کا شکرگزار ہونا چاہئے جہاں ہم بڑے ہوئے محبت کے رشتے قائم کیے اور اپنے خاندانوں کی پرورش کی۔ نو منتخب صدر کا کہنا تھا وقت آگیا ہے ہم سب ایک ساتھ آگے بڑھیں اور ایک ملک کی صورت ترقی کریں۔ڈونلڈ ٹرمپ نے امریکہ کی تاریخ کے مشہور ترین صدور میں سے ایک صدر ابراہم لنکن کے الفاظ دہراتے ہوئے کہاصدر لنکن نے کہا تھا سارے امریکہ کی ایک آواز ہونی چاہئے۔ انہوں نے کہا ہمارے پاس ایک نیا موقع ہے ہم اپنے شہروں کو واقعتاً محفوظ بنائیں اورایک محفوظ معاشرے کی تعمیر کریں۔ان کا کہنا تھا ہماری تاریخ ساز الیکشن کمپین ختم ہوچکی ہے لیکن اب اس سے بھی زیادہ اہم قومی کمپیئن شروع ہوئی ہے اور میں چاہتا ہوں کہ آپ سب امریکہ کو ایک بار پھر دنیا کا عظیم ترین ملک بنانے میں میرا ساتھ دیں۔
ٹرمپ