لاہور (خبر نگار) پاکستان پیپلز پارٹی سنٹرل پنجاب کے صدر قمر زمان کائرہ نے پی پی پی پنجاب آفس ماڈل ٹائون لاہور میں دوسرا روزبھی مصروف ترین گزارا۔ انہوں نے مختلف وفود سمیت معزز صحافیوں سے بھی ملاقاتیں کیں۔ قمر زمان کائرہ نے چوہدری منظور احمد کو یوم تاسیس پروگرام کا کوارڈینیٹرمقرر کردیا ۔گذشتہ روز 14رکنی علماء دین کے وفد سے ملاقات کے دوران علماء دین کی طرف سے بلاول بھٹو کے ہاتھ مضبوط کرنے کے لئے بھرپور تعاون کا اعادہ کیا گیا۔قمر زمان کائرہ نے اس موقع پر کہا کہ ذوالفقار علی بھٹو نے اسلام، جمہوریت، عوام اور دنیا کی جو بلا تفریق خدمت کی، وہ روز روشن کی طرح عیاں ہے، بھٹوازم کو آگے لایا جائے گا۔اسلام و جمہوریت، ملک و قوم کی خدمت کریں گے۔علمائے دین کے وفد میں صاحبزادہ احمد سعید، صاحبزادہ عبدالرحمان،صاحبزادہ سید احمد معین، پروفیسر ڈاکٹر پیر عابد حسین، صاحبزادہ عرفان انور نقشبندی، پیر طریقت سید خالد کاظمی، چوہدری فاروق احمد، قاری محمد یونس نقشبندی، ڈاکٹر بدر منیر، ڈاکٹر عبدالجبار شاکر ، پیر محمد علی و دیگر علماء شامل تھے۔